Ola piki ebe lema do sahele. Gae bu salah ata rewo. Ebe molo mesa. Apa walo ata eo naja diiwa bu kai dagu. Iwa kai Mosa Laki, iwa kai ria bewa, iwa kai boge hage. Muri mera sama bu ngere imu riu eo rewo. Mae mema gare bheri.
Ebe rate mema, sako mema ola mbabho, dau bu eo salah mesa. Molo tungga kai ebe. Demi ata di eo iwa bu pusing peduli, miu ele reto - reto kai, ghea tau ngeta sapapa.
Pati jie ata, aja agama, nau nena so kita dau mbana leka jala eo masa, dau leta leka wolo eo molo, dau ndu leka sura santo.
Iwa so lema leka ina. Ghawa Nazaret disama. Yesus eo ebe mbeo dowa so ana ata miskin, ine kai mbeo lema ngaji ngora iwa duna nelu, Ema kai lema tukang kayu, ebe ele ilo sala diiwa.
Wole ale..... Sai bega ghea..? Ele ebe mbeo bu ina Yesus pati tanda heran, eo Lengge pati jie, Tuan pesta moke sawe, Yesus pati jadi lewa ae jadi moke, paling enak diantara semua moke.
Naja kai eo ate loo, tetap ate loo. So mbana lapor ghea ata dua one nua, Yesus so penu ndelu ata dua one nua moki enga. Lema ngere mbo ae meti. Gae jala tau pati salah walo.
Yesus penu iwa do rewo :"... Seorang nabi dihormati dimana - mana kecuali ditempat asalnya sendiri, diantara kaum keluarganya dan dirumahnya.
Piki lara dube mete do lema peku ndengu,.. Bega.... Kai ghea iwa sama ngere tuka bela kai eo rewo. Iwa sama ngere tuka bela kai Yakobus, Yoses, Yudas dan Simon.
Kita Dau Bhondo, Mae Loo Dau Kapa, Mae Nepi
Sama bu ngere ngoni ina. Ngoni eo tau ngoni nebo. Ngoni eo tau tebo hale nebu mboa , ngoni eo tau maba kasur, eo nebu awu mbewu.
Demi toko sumbu lema saura rua, kau tau maba kasur, kasur penu so :"Kau gharu ga lema nge... re hale mboa..Epen. Lema nge... re matakai Daus mini, aku ele rasa saloo diiwa.
Demi tau je nebo, papa kaju sambua mbuta, demi ngoni lema saura rua, papa kaju ndeo tamba walo lagu, Jopu ana je... Je Wunu lele. So demi tau maba hale lema noo toko sumbu saura rua, laje hale noka. Tamba nggili nggeo.
Naja ria kunu bhondo, ria lema naja bhondo lema kunu. Kobe leja sifa Sara kita dau bu molo kita, eo rewo sala mesa ngai wiwi kau eo ria, moki kau eo dea lea. Nau nena ata kau juara, gare wesu leda.
Kita walo jolo noo bebo kita saregu, ebe ghea nebu roi doli. One lepa mena one lepa ghale sama - sama pai ame. Sai tau mbeo keto kai, ina urusan ebe eo gha nua.
Mbana ruwu jaja noo one lepe mena, one lepa ghale kiri. So mbana lepe ghale, lepe mena kiri. Lema ngere ata naka lambo laa. Gare apa ebe ghea. Leka jolo malas tau, lu.. lu,... gue... gue.
Mbeo lema tau kema bogo runga mbua, doi langga ngala walo nua. Nebu musu bako noo ebe ata ame ghea, jaja.. Pai do :"Nara... Mai da gha roa. Tau apa le.... Ata nebu musu bako ina di. Mai da gha selama roa... Hooo... Minu le kopi roa. Pai kode wee dowa, tau one lepe mena noo one lepe ghale ngiri tei.
Mbana do ina. Pai - pai na. Ata weta so :... Wee... Nara, demi kau sapa noo lepe ghale mae bu mbana lepe mena, demi sapapa noo lepe mena mae bu mbana lepe ghale.
Soooo weta... Mena di sai, ghale di sai leeee. Ebe ghea ame aku mesa.
Hmmmm.... Kau gharu bu nau iwa ndu nara. Kau Lee papa rua... Ngere Robin.... Na. Hoooooo... Ele Lee papa rua ka, papa lima ka... Aku mbeo lema tau mbana - mbana. Ghea di sai..... Gha di sai. Ata dua nau paa dowa so... KITA DAU BHONDO MAE LOO, KITA DAU KAPA MAE NEPI. NDU TEMA KAI OLA PIKI MIU GHA NUA.....
* Mathias Saka, pensiunan Guru PNS. Kelahiran Kampung Wulawatu, Kecamatan Lio Timur Kabupaten Ende, Flores, NTT - Indonesia.
