Manusia ghea nua mbeo sawe. Mae sai ghelo ngere nake ae. Ipa rua repa ngao ngetu iwa leta ke buja.
Ipa A noo Ipa B. Ipa B ghea biasa nosi bu kai eo dosa iwa. Tolo sengga demi ata ale baje. Dau so dema ria, dapi noo nggoti nggomi. Hmmm.
Ipa A pani noo hinga rango do mbana ale leda.
**Ipa A :- Toto hila tei lako ndeto nebu Boro nggu ghea lemi maga. Ina Ipa... Kau bu ngete o.. Lako ndeto eo pani gebo Lengge bu gharu.
**Ipa B :- Sooo... Ipa doa... Mae kai handa nau Mbola ne ghelo....
Ipa A :- Eo apa ngelo..?
**Ipa B :- Ipa tai so aku iwa tei jara keli sili kiwa bu ghea puu sompe mera mai.
**Ipa A :- Lema kai sili kiwa Ipa, gha kau lako ndeto Lengge leda.
Hahahaha e e... Tawa geka leda ebe lpa rua.
**Ipa B :- Ema nosi, Ine... Tungga kai hinga neku mae peme... Mboko mata neku mae tei. Iwa.....?????
Wau Wia, Poa Kota, Lake Lika, Lai Tangi
Talo.. Ata Flores tau jadi Presiden. Ngala lema Gubernur, menteri noo bupati. Menteri di ngai ote ria, ote ngai sia, ote bina. Mesi lema peme kunu bhoti... Talo.
Nelu kai wee dowa, 17 April 2019. Ata dua biasa gare so "kobe pau watu" nosi so pesta demokrasi. Iwa kai pesta bega. Sama bu ngere KUD tau so Koperasi Unit Desa, padahal Ketua Untung Duluan.
Lema beka bu leja wiwi ebe eo ngai sia. Sama ngere ata dua baje ana loo so... Ina bombo. Wee ana loo raka hee. Masyarakat kai bu ana loo eo ebe lema tau baje bego. Nosi pesta. Lara tawa ke demi nara tei. Raka guru - guru di ebe baje...
Miu na Pahlawan Tanpa Tanda Jasa. Guru walo eo karang lagu. Lara tawa rao. Guru mata rate noo dua - dua, iwa so ghea Taman Makam Pahlawan. Naja kai ebe eo ngai sia tau renggi kita wee aja bugu.
Iwa do repa pio rewo. Kita ina sama ngere geti gula sakilo rp. 1000,-kita teka walo setengah kilo rp. 300,-jadi rp. 600,-kita dapa. Iwa do utu, rugi modal rp. 400,-
Syukurlah demi gol. Kao wula ja. Demi mete lema kola kunu sama ngere ae seru eo kita nosi mbana pesta demokrasi la lowo lau. Gae ae seru soo petu. Puu apa..???
Kita wau wia do, poa kota do, langga hasa do, lake lika do, lai tangi do. Pada hal ae seru demi kita uju ngere kaju uju, boka ngere hi bere ngere ae, bou ngere uwi onu, ngere kumi rongo, saholo rua wakil rakyat ngala mera leka kadera DPR.
Talo.... Kita gha dau bu wau wia, deki mbendi pia do wala nia, poa kota, kota kora do, lake lika, repa pia do, lai tangi, repa tebo do. Wakil rakyat too gha nua ola kita mai lele do lema engko. Gae soo petu... Dapa AE seru... Syukur.
Nua ola eo rewo, bagi mema. Miu pilih eo ina,... Kami pilih kai gha,... Sabagi pilih kai gharu. IWA DOWA POA KOTA..........
Ndu bu noo bhondo loo kai manusia eo latu. Hasil kai dua ngeta mbeo mema. ELE KAI KPU LAE KEA SIA...... Ina baru ngai sia.....
Au Lodo Moda
Ate dhoa dema.. Bega. Ebe ata dua eo mbana dowa. Mesi aku ngala deo ngai... Mawe roa mbana... Mawe roa mata. Muri mera kita roa... Jaja jau kita roa.
TV ele ke pati mata roa. Noo aku ele mae kai. Tungga kai mamo, embu miu.. Eo tei bu ebe puu noo miu eo reki ra. Ina demi babo. Demi mamo... Tei bu ebe sakunu rana... Puu ngai Lengge bu too gharu kambu... Mamo.
Kobe leja.. Nara tei hee kai leka nau nena. Sahele kai eo aku nara tei gudu wee..... Kau dau ndu sifa Sara eda kau.. Eo mboke bu lau ae petu nebu ina. Ele eja kera, aku iwa pernah noi noge noo kai. Muri latu, naja di iwa wau.
Ganteng... Umi tawa ata fai mo mata, ngai sia ... Pemeeeee demi ata gare. Ana loo gare di kai peme. Ata di sena.
Gha miu nebu ina... Mbale do... ".. AU LODO MODA.." Gare di iwa do repa peme.
Kita so penu..... TOTO SOU - TOTO SOU.. bega miu gharu. Nebu kai nuwa nai bega.... SAGOBIIIII.... MIU... DEMI NAU IWA NDUUU......
* Mathias Saka, pensiunan Guru PNS. Kelahiran Kampung Wulawatu, Kecamatan Lio Timur Kabupaten Ende, Flores, NTT - Indonesia.
